هەواڵی کوردستان ئێستا

شەفەق نیوز/ وەزارەت ناوخۆی عراق، ئمڕوو چوارشەممە، خەوەردا کە پولیس فیدڕاڵی 13 توومەتبار دەسگیر کرد دەسیان هاناو کوشیان و زەخمداری 6 کەس لەناو وەردەوەردەیگ چەکدار خوەرهەڵات بەغداد.

وەزارەتەگە دیاری کرد کە دویای رەسین خەوەر لە وەردەوەردەیگ و تەقەکردن لە ناوچەی حسێنیەی بەغداد، وەکوتپڕ هیزیگ لە لیوای بیش فیرقڵی پەنجەم لە پولیس فیدڕاڵی رەسیە شوین رویداوەگە، کە کوشیان 4 کەس و زەخمداری 2 کەس لە ئەنجام تەقەکردن لەبان مرافەی مناڵەیل دەرکەفت.

وتیش: تیم کارکردن هاوبەش وەرد دەزگایل ئەمنی لە کەرت وەرپرسایەتی دروس کریا، و دویای مینەکردن و گردەوکردن زانیاری و وەشوینکەفتن کامیرایل چەودیاریکردن، ڕەشتە تاوانکارەیل و 13 توومەتبار دەسگیر کریان کە 4 تفەنگ کلاشینکۆف و دەوانچەیگ وەپییان بویە.

وتیش: توومەتبارەیل وەگەرد چەکەیلیان دریانە دەس لایەنەیل پەیوەندیدار ئەرا تەواوکردن ریکارەیل یاسایی.