کەنعان موڕاد/ لە سەردەم دیکتاتۆری سەدام حسێن، تەنیا وەرخودانیگ لەناو مەردم، کە وە درویژایی سەردەم رژیم وەردەوام بوی، خوەی وتن (نوکتە) و هەنەکی و دەمپاسکانی وە کار و کردەوەیل خود سەدام یا کەسەیلیگ لە رژیمەگە بوی.
نوکتە وتن جویر هەناسەیگ بوی کە لەناو ئەو هەمکەی تاسیانە هاتیاد، یا جویر هوچانیگ لە خەفەت و خوسەی دەس ستەم بوی، یا گڕیگ ئازادی لە زیندان گەورەیگ بوی، کە گشت وڵاتەگە گردوێد.
وتن نوکتە هەرچەن فرە فرە رخدار بوی، کە مل خاوەن نوکتە و گووشگرەیل دەێدە پەتەو، وەلێ هەر جویر فچەفچیگ مەن، جویر باوەت باویگ لەناو گشت مەردمەگە.
لە سەردەم دیکتاتۆر، رەفتار بەد دەسەڵاتدار و ستەمکار، بویادە چشتیگ هەنەکی، وەلێ ئەو هەنەکیە لە راسیەو، خوەی تویڕەیی و رەخنە و نەفرەت بوی، لە رەفتار بەد، و لە ئەنجام سەختی گوزەرانی و بیئومیدی و زەخمەیل دەروین.
دروسکردن ئەو نوکتەیلە، شیوەیگ ناوازە لە زیرەکی خوازێد، تا بڕیگ چشت وەیەکەو بوەسێد، و پەیامیگ لەناو ئەو نوکتە بوود، هەمیش تا گوزشگرەیل خش بکەن لە خەنە، تا ئرمس و لێڵاو بان چەویان بگرێد، کە نوکتە بوودە تفەنگ بی دەسەڵات.
کەسەیلیگ بوین، توانای گەورەیگ داشتن لە هەڵوەسین نوکتە، و دروسکردن کوڵە چیرووکیگ، کۆتایی وە خەنە تیەێد، ئەو کەسەیلە کە پڕ دڵیان لە داخ و چەوسیان و خوسە و خەفەت بویە، و گووشیان کاس بویە لە ناو دەسەڵاتدارەیل، کە لە هەر شوینیگ روی کەێد، وینەی خوەی هەڵداگە، و هەمیشە لە تەلەفزیۆن و ڕادیۆ و رووژنامە کۆڤارەیل ناوەی ئویشن، و لە کتاوەیل خوەنەواری، هەرلە مناڵیەو، شاخ و باڵ ئەرای دروس کەن.
لەی ناوە، جیگر سەدام حسێن، (عزەت دوری) بویە خاوەن بەشە گەورەگە، لەو نوکتە و هەنەکیەیلە، کە مەردم عراق دروسی کردیان.
لە نووڕین خوەم، (عزەت) کاریزمایگ نەیاشت شوین ئەو وەرپرسایەتی گەورە پڕەو بکەێد، و لە خود وەختیش، هەمیشە وەگەرد سەدام بوی، و ئەو کەسە بوی کە هەمیشە پشت سەدام گردیاد، و ئەرا هەر قسە و کردەوەیگی چەپڵە کوتیاد، و رەنگ سوور و دەنگ کڕ، و باریکی و درویژیی، هیشت بوودە کاریکتەر خاسیگ ئەرا ئەو نوکتەیل و هەنەکیە.
وەگەرد ئەو هەمکەی نوکتەیلە، رخداری ئەوە باو بوی کە (دیوار مویش دیرێد، مویشیش گووش دیرێد) کە شایەت کەسیگ لە پشت دیوارەو، گووش لەی نوکتە گرێد، ئمجا بچوود لەلای بەعسیەیل (بدیمان) بکەێد.
(بەدیکردن) واتە بچوود ناو کەسەیلیگ بیەێدە دەس دەسەڵات، کە کاریگ یا قسەیگ وەدژ حزب و دەسەڵات و وەرپرس کردگە، و ئی وشە لەو سەردەمە فرە باو بوی کە دیارە لە وشەی (بەد) هاتیە کە ئی کابرا (بەدە) ئەگەر زانن کە ئەو کەسە قسە ئەرا دەسەڵات بەێد.
بەد واتە گەن، کە لەو سەردەمە لەوە گەنتر نەویە، جویر ئەوەگ مەردم خوەی دەێدە دەس دەسەڵات.
ئیرنگە، کە لە سەردەم دیکتاتۆر قورتار بویمنە، وەلێ نیەزانم تا چەنیگ ئازاد بویمنە، کە هیمان (فچەفچ) نوکتە لەبان کەسەیل دەسەڵاتدار ئی سەردەمە هەس!.