ئەنجوومەنى نوێنەران دەنگى لەسەر پرۆژەياسايەكى تايبەت بە ژن و كچە رزگاربووە ئێزدييەكان دا
دیجیتاڵ میدیای سپێده
ئەنجوومەنی نوێنەرانی عێراق دەنگی لەسەر پرۆژەیاسایەکی تایبەت بە ژن و کچە رزگاربووە ئێزدییەکاندا و پەسەندی کرد.
بە گوێرەی راگەیەنراوێک کە لە نووسینگەی نوێنەری کۆتای ئێزدییەکان لە پەرلەمانی عێراق، سائیب خدر-ه‌وە دەرچووە، دوای ھەوڵ و ماندووبوونێکی زۆر و ھاوکاریی لایەنەکان له په‌رله‌مان، کۆتاییان بە دەنگدان لەسەر پرۆژەیاسایەکی تایبەت بە ژن و کچە رزگاربووە ئێزدییەکان داوه.
راگەیەنراوەکە ئاماژە بەوە دەکات یاساكه یەکەم یاسای تایبەتە بە ئێزدییەکان لە سیستمی یاسادانانی عێراقدا و سوپاسی سەرجەم فراکسیۆنەکانی پەرلەمان و ھەرسێ سەرۆکایەتییەکەی عێراق و کۆمەڵگەی نێودەوڵەتی دەکات بۆ پاڵپشتیکردنی.
بە پێی راگەیەنراوەکە ئەو یاساكه چەند بڕگه‌یه‌ك لەخۆدەگرێت بۆ پشتیوانییكردنی خاوەنی قوربانییان و ئەو ژن و کچە ئێزدییانەی کە رزگاریان بووە.
هه‌روه‌ها جەخت لەوە دەکاتەوە کە ئەو دەقانەی یاساکە کە بۆ پشتیوانییكردنی رزگاربووەکان چاککراوە، پێدانی ئیمتیازاتی وەکو مووچەی مانگانە، پێدانی پارچە زەوی، پێدانی قەرزی خانووبەرە و لێخۆشبوون لە مەرجی تەمەن بۆ گەڕانەوە بۆ خوێندن، لە خۆدەگرێت.
جگە لەوە ھەر بەپێی راگەیەندراوەکە، چەند چینێکی دیکە بۆ یاساكه زیادکراوە وەک رزگاربووان لە کۆمەڵکوژییەکان و منداڵە ئێزدییە رزگاربووەکان و بابەتی دیکە بۆ پاراستنی بەرژەوەندیی ژن و کچە رزگاربووە ئێزدییەکان.
نوێنەری کۆتای ئێزدییەکان لە پەرلەمانی عێراق، سائیب خدر لە کۆتایی راگەیەنراوەکەیدا، پیرۆزبایی لە ژن و کچە رزگاربووە ئێزدییەکان دەکات و بەڵێنی بەدواداچوون بۆ یاساکە دەدات تا جێبه‌جێكردنی.
