ماڵ روشنهزیری فەیلی.. “چالاکی بی بودجە و بی بارەگای هەمیشەیی”
شەفەق نیوز/ ماڵ رووشنهویری فەیلی لە ساڵ 2013ەو لە بەغدا کار کەێد تا رووشنایی بخەێدە بان ئەدەب و هونەر و میراتی کوردەیل فەیلی، و تونستیە لەڕی زنجیرەیگ کار وە ئامانج مقیەتیکردن یادەوەری مەردم و بەرزکردن هەمەجویریی لە کۆمەڵگەی عراق سەرنج بکیشێد.
وەگەرد گشت ئەو ئاستەنگ و سەختیەیل فرە کە "ماڵ" سەروە وەزارەت رووشنهویری عراق تویشیان تیەێد بەڵام رکداری لەبان درویژەدان وە بەرنامە رووشنهوریەیل و گەشتە جویراجویرەیلی کەێد، وە قسەی خانمە وەڕێوەبەر کارەگەی، فەخریە جاسم.
جاسم ئەرا ئاژانس شەفەق نیوز وت: ئەو ماڵە هووڵ مقیەتیکردن رووشنهویری و ئەدەبیات و هونەر و زانست فەیلییە لە سەرجەم لقەیلی، و سەر وە بەش پەیوەندییە رووشنهویریە گشتییەیلە لە وەزارەت رووشنهویری و گەشتوگوزار.
وتیش: چالاکییەیل ئەنجومەنەگە فرەن و جویراوجویرن، لەوانە پیشوازیکردن لە نویسەرەیل و ڕێکخستن ئاهەنگ واژووکردن کتاو و ڕێکخستن چوار بوونەی مانگانە، بیجگە لە نمایش شانۆگەری لەبان شانۆی نیشتمانی و شانۆی رافیدەین.
ئی چالاکی رووشنهویریە لە ساڵ گوزەشتە رێزلێنان تایبەت لە بەش پەیوەندییەیل رووشنهویری لە وەزارەت رووشنهویری وەرگرد، جویر دانوەپیدانیگ ئەرا زڕنگی و گورجی و وازبوین ئەرا دامەزراوە جیاجیایەیل، جویر وەزارەتەیل خوەنستن باڵا، توێژینەوەی زانستی و تەندروسی، و ئەکادیمیای زانستی عراق، و بڕیگ وۆرک شۆپ و سیمینار و پێشانگای هونەری ئەنجامداگە.
بەڵام لە ساڵ 2014 و، وەزارەت رووشنهویری پاڵپشتی دارایی راسگانی ئەرا ماڵەگە پیشکەش نەکردگە، کە هیشت وەرپرسەیلی پشت وە توانای خوەیان و بەشیگ دەسپیشخەری فەیلی بوەسن.
وەقسەی وەرپرس راگەیانن لە ماڵەگە، عەلی مەهدی؛ ماڵ رووشنهویری فەیلی رکدارە اە بەشداریکردن لەو بوونەیلە بکەێد کە لە هەولێر و سلێمانی و ئەنبار و پارێزگایەیل ترەک وەڕیەو چن، و سازدان پێشانگای شیوەکاری و میوانداریکردن هونەرمەنەیل و نویسەرەیل وە جویراجویر پسپۆڕییان.
مەهدی باس هاوکاری وەردەوام کۆمیسیۆن ماف مرۆڤ کەێد، تا ماڵەگە بتوانێد ئەو تاوانەیلە بناسنێد کە رژیم وەرین وەرانوەر کوردەیل فەیلی ئەنجامی داگە، وە ئەنجامدان سیمینار و وۆرک شۆپ هاوبەش لەو باوەتە.
لە چوارچیوەی چالاکییە وەردەوامەیل، ماڵەگە گرنگییگ تایبەت ئەرا چالاکییە ساڵانەی گەورەی دەێد کە وە هاوکاری دەزگای شەهیدەیل وە بوونەی “رووژ شەهید فەیلی” لە یەکەم مانگ نیسان ئەنجامی دەێد، و رکدارە لە ئەنجامدان سەردان خیزانەیل لە ناوچەیل کیفاح باب شێخ، و ناوچەیل ترەک بەغدا، ئەرا پیشکەشکردن هاوکاری و پشتیوانی ئەخلاقی، دووپاتکردن لە پەیام مرۆیی و کولتووریی.
وەگەرد ئی تەقەلایلە، ماڵ رووشنهویری فەیلی هیمان وەدەس کەمی پاڵپشتی دارایی وەزارەت رووشنهویری ناڵێد.
وەقسەی ئەو وەرپرس ڕاگەیاننە، چالاکییەیل ئەو ماڵە و سپۆنسەرکردنی سنووردارە وە تەقەلای خود وەڕێوەبەرەگەی و پاڵپشتی بەشیگ لە ریخریاگ و قەوارەیل فەیلی، و تا ئیسە هویچ لایەنیگ فەرمی نەجویلیاس ئەرا تەرخانکردن بارەگایگ هەمیشەیی ئەرا ماڵەگە، هەرچەن پارچە زەوییگ هەس کە رووبەرەگەی دوو هەزار مەترە، وەرجە دە ساڵ ئەرای دیاری کریاس، وەلێ تا ئیسە دروس نەکریاس.
وتیش: ئیرنگە ماڵەگە لەلایەن ئەنجومەن شارەوانی شارع فەلەستین میوانداری کریەێد، و هویچ بارەگایگ هەمیشەیی نەیرێد، یەیش هیلێد پڕۆژەگەی لە هەر وەختیگ هەڕەشەی رمیانی بوود.
