رخیگ لە ئەنتارکتیکا.. چە بویە؟
شەفەق نیوز/ ئەو زانایەیلە لە بنکەیگ توێژینەوەی جەمسەر باشوور گیر خواردنە، لە دەسەڵاتدارەیل لاڵگیانە دەسوەردان بکەن، دویای ئەوەگ وتنە کە ئەندامیک تیمەگە هەڕەشەی کوشتن هاوکاریگی دەێد.
زانایەیل ئەفریقای باشوور لە سەنتەر توێژینەوەی سانای 4 لە وێسلێسکارڤێت، کوین ماود لاند، کە لەلایەن پرۆگرام نیشتمانی جەمسەر باشووری ئەفریقا وەڕیەو چوود، لەورا جیگیرن، شاندەگە لەناو رەوشەیل سەختیگ وە تەنیایی و لە جیهان بڕیای ژیەێد، پلەی گەرمی زمستان رەسێدە -23 پلەی سەدی، لە وەختیگ وا وە تونی 241 کم لە ساعەتیگ هەڵکەێد، یەیش هیلێد پەیوەندی وەگەردیان فرە سنووردار بوود، وە لەوەرچەوگردن مەودای بنکەگە 4023 کم لە نزیکترین خاڵ لە باشوور ئەفریقا.
باس لەوە کریا کە یەکیگ لە زانایەیل هەفتەی گوزەشتە ئیمەیڵیگ کلکردیە و وتیە گوایە تیمەگە لەلایەن ئەندامیگەوە هەڕەشەی کوشتنیان دریاس.
لە ئیمەیڵەگە کە رووژنامەی سەندەی تایمز دیەسەی ئویشێد: “وەداخەو رەفتارەیل فرە دەڵگرانکەر زیای بویە، لەورا دەسدرویژی کردیەسە بان [س].
ئەو زانا وتییشە توومەتبارەگە دەسدرویژی سێکسی وەبان هاوکارییگ ترەک کردگە و باس "رەفتار ناشایستەتر" کردگە و داوا دەسوەردان زویوەزوی کردگە ئەرا دڵنیابوین لە بیوەیی تیمەگە.
لە نامەگەی وتیش: “فرە وە سەختی چەوەڕی بیوەیی کەم لە ئامادەبوین ئەو کابرا”.
دیۆن جۆرج وەزیر ژینگەی ئەفریقای باشوور لە قسەیلی لەبان رویداوەگە وت: خوەی قسە وەرد تیمەگە کەێد تا بزانێد چە بویە.
جۆرج ئاشکرا کرد کە رویداوەگە وە دەمەقاڵیگ ناوەین سەرۆک تیمەگە و توومەتبارەگە دەسوەپی کردگە، وەرجە بەرزەوبوینی ئەرا دەسدرویژی.
ئەرا رووژنامەی سەندەی تایمز وتیش: "شوینەگە تەنگە، گرژییەیل فرەن، کە هیلێد چشتەیل وە ئاسانی لە ژیر کۆنتڕۆڵ دەرچن."
