هەواڵی کوردستان ئێستا

‍ ‍ کوڵە چیرووک 

سێ برا، لە تەنیا بیمارسان شار، بان سەر باوگیان گرتۊن و چمان هەور وەهار گیرسن و داد و بێداد کردن.

پەرەستارەگان هەم، لەبەو لیان لاڵکیان تا داد و بێداد کەمەو بکەن، زوانیان مۊ دەر هاورد. بەڵام دوون هەر ئەو دوونە بۊ و گاجار ژنەگان هەم دانگی نانەو بان هاوار و هاناێ پیاگان...

باوگ لە بان تەخت کەفتۊد و وای گووپ دا و گاجار پایەموری چڕی و گەپ لقمان حەکیم دا و چوار دیوار دەوری و سراڕای سان.

ئاخری، پیای کوڕەگان چڕی و وت:

م، دی دۊاگیانمە، هۊردان وە یەکەو بوود و چەودان وە ماڵ حرام نەوود و لە خودای بان سەر بترسن و لە خەڵکیش چەو بپرتنن و گوزەیشتکار بوون...

هوتڵەگان ئڕا کوڕە گەوراگە، ڕستورانەگان و هەرچێ چێشتخوەریخانە هەس، ئڕا کوڕ دوەم و دکانەگان هەم ئڕا کوڕ بۊچگ...

چاخی نەکیشا، پیای تەمام کرد و کوڕەیل کوتەڵکوو خوەیان ئڕای باوگ کردن و وانگ فرەی ئڕاێ هڵاوردن...

یەکێگ لە پەرەستارەگان وەت:

خودا شوکر ئڕا ئێجور باوگێ، هوتڵ و ڕستوران و دکان لوا لە ناوەدان بەش کرد، بەڵام هەر جور پیای ناوچەی خوەمان، ناو هۊچ ژن و دۊەتێ نەهاورد و بێ بەشیان کرد...

کوڕگەورا وەت:

خوەیشکە پەرەستار، هوتڵ چوە و ڕستوران چوە و دکان چوە؟

باوگ ئیمە، وە نەیسان کەوێگەو، ئاومادەنی لە ناو شار پەخش و بڵاو کرد، ئلانیش کارەگە لە ناومان بەش کرد، وە خودا هەیمان، ژێرماڵەی مەردمیم...

فەرهاد عزەتی زادە