هەواڵی کوردستان ئێستا

شەفەق نیوز/ وەگەرد زویوەزوی پیشکەفتن زیرەکی دەسکرد و فراوانبوینی لە کەرتەیل جیاجیا، نیگەرانیەیل لەوەر لەدەسدان کار و ئاڵشتبوین ئایەم وە تەکنەلۆژیای سەردەمیانە زیاترەو بوود.

بیل گەیتس دامەزرێنەر کۆمپانیای مایکرۆسۆفت دووپات کەێد کە چەن پیشەیگ هەس لە بانانیگ نزیک وەرگری لە داگیرکردن زیرەکی دەسکرد کەن.

وە قسەی گەیتس، هیمان سێ بوار وە پلەی یەکەم پشت بە توخمە مرۆییەیل بەسن: بەرنامەسازی، کەرت وزە و توێژینەوەی پزیشکی و بایۆلۆژی.

گەیتس وتیش؛ شایەت زیرەکی دەسکرد  دەسمیەتی لە نویسانن کۆد بەرنامەیل، بەڵام هیمان گیچەڵ لەو کارە دیرێد لە داهێنان و راسەوکردن هەڵە ئاڵۆزەیل، ئەراوە هیمان پرۆگرامەرەیل شارەزا خوازید کە توانای پەرەپیدان سیستەم زیرەکی داشتوون.

گەیتس وتیش: کەرت وزە، چ لە بوارەیل نەوت، سەرچەوە نووەوبویەل، یا وزەی ئەتۆمی، فامستن هویرد لە سیستەم و ڕێساگەیل خوازێد، بیجگە لە بڕیاردان ستراتیژی وەردەوام. هەرچەن زیرەکی دەسکرد بەشدار بوود لە خاسترکردن کارایی، بەڵام ئەزموون ئایەم لە وەڕێوەبردن ئی کەرت گرنگە هەر مینێد.

لەباوەت بوارەیل پزیشکی و بایۆلۆژی، گەیتس دووپات کرد کە ئاگا و هەستکردن و داهێنەر ئایەم خوازیارییگ تەواوە، هەرچەن توانای زیرەکی دەسکرد ئەرا شیەوکردنە داتای گەورە و خاسترکردن دەسنیشانکردن پزیشکی هەس.

زانایەیل لە پیشەنگی داهێنان پزیشکی مەننەسەو و زیرەکی دەسکرد ئامرازیگ دەسمیەتیە نەک جیگر هویرکردن ئایەم.

گەیتس دیاری کرد کە کاریگەریی زیرەکی دەسکرد لەبان بازاڕ کار وەگەرد وەختەو زیای بوود و داوا لە پیشەگەرەیل کرد خوەیان وەرد تەکنەلۆژیا نووەیگ بگونجنن بەڵکم لە بەرهەم لەناوی بارن ئەرا بەرزکردن توانایەیل، وەتایبەتی لەو پیشەیلە کە پشت وە داهێنان و ئەخلاق و پەیوەندی مرۆڤایەتی بەسن، جویر پەروەردە و تەندروستی و هونەر.