هەواڵی کوردستان ئێستا

شەفەق نیوز/ هیمان ئەو یادەوەریەیل خەفەتدارە لەناو ویژدان کوردەیل فەیلی بنەو گردنە، وە تاڵی و خەفەتی لەلای قویتا دەن، دویای ئەوەگ وە جویراجویر چینەیلیان دوید ستەم وەخوەیان دین، کە کەسیگ لە کوشتن و بڕین دەسەڵات دیکتاتۆریەتی ئەو وەختە ئاسوودە نەوی، تا رەسیە هەسارە ناودیارەیل تووپان عراقییش.

لەناو ئەو ناوەیل فەیلی ستەمدیدە، ناو هەسارەی تووپان عراقی، و گۆڵچی وەتوانای، کاپتن قاسم ئەبو حەمرە کەفێدە ناوەیل، کە یەکیگ لە دیارترین گۆڵچیەیلە لە میژوو تووپانبازی عراقی، لە ئاست یانە و هەڵوژاردەیل نیشتمانی.

ئەبو حەمرە ئەرامان باس زیان خوەی کەێد وەرد رژیم وەرین و ئەو ستەمە کە کەفتە بانی، و ئەو قوربانیەیلە کە پیشکەشیان کرد هویچیگ لە ئەرای نەکردن هەناێ بنەماڵەی ئەبو حەمرە دوو لە کوڕەیلی لە جەنگ عراق و ئیران کوشیان، کە باسم و حازم بوین، لەبان ئەوەیش، ستەم رەسیە خوەی و بنەماڵەی.

 کاپتن ئەبو حەمرە ئەرا ئاژانس شەفەق نیوز باس کاروان زیان دویرودرویژ خوەی کەێد کە ئویشێد: لە سەردەم رژیم وەرین، هەنای خیزانەیل کورد فەیلی بار کرد، خوەی یەکیگ لەوانە بوی کە باوان داڵگی لە میمگ و خاڵوەیلی بار کریان، کە گشتمان لەناو ماڵیگ گەورە لە قوشلە لە ناوچەی سەدریە لە بەغداد وەیەکەو بویمن، کە شەش خیزان لەناو ئەو ماڵە بوی، من و باوگم و داڵگم و برایەیلم لەناو ژوور گەورەیگ، و خاڵو و میمگەیلم لەناو ئەو ژوورەیل، تا رووژیگ لە رووژان، پیاوەیل ئەمن پەرد بوینە ناو ماڵەگە، و گشتیان بردن، و تەنیا خیزانەگەم هیشتن، تا دی خوەمان تەنیا لەناو ئی ماڵ گەورە مەنیمن، ئەوان چگن و خەفەت گەورەیگ ئەرا ئیمە وەجی هیشتن، وەلێ ئیمە لە بارکردن و دەرکردن قورتار بویمن چوینکە باوگم ڕەگەزنامەی عوسمانی داشت، هەرچەن خوەی فەیلی رەسەنە، و شایەت چوینکە ئەو مەوقە من بازیگەریگ ناودەوڵەتی ناودیار بویم، کە هیشت ئەمنەیل پاپا بکەن لە بارکردن ئیمە، وەگەرد ئەوەیش هەر لە ختوورە و نیگەرانییگ بویمنە مەگەر خودا وەپی بزانێد.

 لە هویرم تیەێد هەناێ خاڵو و میمگەیلم (سەوق) کردن، کە گشتیان لەناو گەراج بەغداد جدیدە (شمارە یەک) گردەو کردن، ئمجا وە پاسەیل گەورە ئەرا بان سنوور بریان، و لەورا لەناو زەوییگ پڕ لە مین، وەبی بەزەیی یا مرۆیی هیشتنە جی، و مینیگ تەقیە بان دویەت میمگم، و پارچەپارچە بوی، و لەورا وەبی کەس نریا خاک.

ئەبو حەمرە باس زیانی وەگەرد تانەی کەسەیلیگ لەناو کۆمەڵەی وەرزشی کرد کە وت: فچەفچ بەشیگ لە هاوڕیەیل بازیکەر شنەویام، وە وە من وتیان (کوردی.. کوردی) گوایە سووکایەتی وەپیم کەن، ئەویش زوور کەورەیگ وەبان دەروینم داشت، و دڵم کردیادە خوین، وەتایبەت کە ئیمە گشتمان عراقی بویمن، وەگەرد ئەوەیش، وەپیم نەکریا وەڵامیان بیەم، چوینکە هەمیشە خوەم لە کێشەیل دویرەو خستیام، چوینکە خوەم بارەگەم لار بوی، چوینکە کورد فەیلییم.

 کاپتن باس پیشهاتیگ فرە رخدار کەێد کە دویای بارکردن میمگی وەسەری هات کە وت: ئەو میمگمە کە جینشین داڵگم بوی، ئیوەت خوەم و برایەیلم کرد، و هەر شوی نەکرد، باری ئەرا ئیران کریا، رووژیگ تەکبیر داشتم وە دزیەو بچمە ئیران و مینەی ئەو میمگمە بکەم، تا چگم و پەیای کردم و هاوردمەی ئەرا عراق، هەڵبەتە وە کار ملهڕی گەورەیگ لە ریەیل قاچاخی، و فرە فرە نزیک بویم کە سەر خوەم بیەمە بڕەو، چوینکە ئەمنەیل لە گشت شوینیگ هەن، و گشت چشتیگ لەبان خەڵک ناوچەگە زانن، کە موختار هەمیشە بەدیمان کەێد، میمگم لەناو ماڵ شاردیمنەو، و ئەو مەوقە ماڵەیل فەیلیەیل هەمیشە لەژیر چەو دارودەسەیل بوین، بیگومان ماڵ ئیمەیش وەوجویرە لەژیر چەویلیان بوی، و ئەگەر کارگەی میمگم ئاشکرا بوود، وەنە کۆتایی میژوو تووپانییم هات، و شایەت کۆتایی وە گشت ژیانمیش باێد، چوینکە ئەمن چاشیاس هەر دە رووژ جاریگ کلکەێدە شوینم تا لە بنکەی پولیس سەرای لێکۆلینەوە وەردم بکەێد، ئەراوە بڕیار دام لەو ماڵە بار بکەم، و بچمە ناو ماڵیگ ترەک لە نزیک شانۆی خەیمە، تا خوەم لەلییان دویرەو بخەم و دی نەکفمە وەرچەو، و خاسە ئەوە وەپیمان کریا.

ئەبو حەمرە هەمیش لە باس ئەو سەختیەیلە کە وەسەری هاتنە وتیش؛ رووژیگ، باوان ئی ژنمە، کە ئەو وەختە دەزویرانم بوی، گشتیان خریانە زیندان تا (سەوقیان) بکەن، و تا یەی هەفتە لەناو زیندان مەنن، دویای ئەوە وەخشین ئەرا ئی چین دویاییە هات کە دی باریان نەکەن، کە خاسە هاتنەو ئەرا ماڵ خوەیان.

لە باوەت دویرخستنی لە هەڵوژاردەی تووپان، کاپتن ئەرامان ئویشێد: لە بازییگ گرنگ لە پاڵاوەی خول بازیەیل ئۆڵەمپیک گۆڵچی هەڵوژاردەی نیشتمانی بویم لە بازیەیل هاتن و چگن وەرانەور بەحرەین و ئیمارات، بازییگ وەرانوەر ئیمارات لە بەغداد کردیمن وە دەرئەنجام یەکسانی 2-2 تەواو بوی، کە دوینم تارق حەسەن شرۆڤەکار وەرزشی لەناو پەخش زنی سووکایەتی وە من کەێد، کە دی نیەزانم لایەنیگ لەلی داوا کردیە یا هەر لە خوەیەو ئەو قسەیلە کرد، وەلێ خوەی زانستیاد کە م کورد فەیلییم، و وتیاد گوایە من نیەتوەنم رینمایی وە بازیگەرەیل بیەم، و هەر تانە وەپیم دیاد، دویای ئەوە دەسەی هونەری لە هەڵوژاردە دەرم کرد، هەرچەن بازی خاسیگ پیشکەش کردم، و توەنستیمن بڕەسیمنە ئۆلمپیاد.

ئەبو حەمرە سەرهاتیگ ترەک تیەرێدە یاد، لە ساڵ  1983 لە ئەڵمانيا: "چگیمن ئەرا شار میونشن تا لەورا بازی بکەیمن، براگەم کە وەرجە بیس ساڵ لە عراق دەرچوێد، و لە ئەڵمانیا بوی، لە وەر چەو  دەسەی هونەری و بازیکەرەیل یەکانگیرەو بویمن، و دویای هەفتەیگ لە گلەوخواردنم ئەرا عراق، ئەمن کلکردە شوینم، و چەن جاریگ لە شوین ئەوە هەر ئەمن داوام کرد کە بوخت وە براگەم کردن کە گوایە لە دەیشت وەگەنی باس عراق کەێد، و نەبایەس بوینمەی، ئەوەیش کاریگەری گەورەیگ لەبان دەروینم داشت و هەمیش لەبان پەیوەندییم وەرد تیم هەڵوژاردەگە، و تا ماوەی فرەیگ کەفتمە نیگەرانی و ختوورە.

  کاپتن قاسم ئەبو حەمرە لە کۆتایی قسەیلی وتیش: ئیمەیل کورد، وەتایبەت کورد فەیلی، ئەوسا و ئیسەیش فرە زیان ئەو سەردەمە وەخوەمان دوینیمن، و ئومید خوازم حکومەت هەرێم کوردستان و حکومەت فیدڕاڵی دادپەروەری وەردمان بکەن، کە ئیمە خاوەن فرەترین زیانیمن لە ستەم و خوسە و بارکردن، و هەزاران قوربانی و شەهید ئەرا ئی وڵاتە پیشکەش کردیمنە.

جی باسە کە کاپتن قاسم ئەبو حەمرە، ئەرا یانەیل سیناعە و جەیش و زەورا بازی کرد، و دەرفەت تەواوی خوەی وەرد هەڵوژاردەی نیشتمانی نەورد، کە تەنیا بەشداری لە 15 بازی ناودەوڵەتی کرد، و خاسترینان لە وەردەم هەڵوژاردەی یوگسلاڤیا بوی، کە ئویشێد ئەوە لەوەر بویین گۆڵچیەیل گەورەیگ بوی لە وەختە جویر رەعەد حەمودی و فەتاح نسەیف و کازم شبیب، و دویای ئەوانیش بویە دووچەوەکی و هەر کەسیگ خاوەن پۆست و دەسەڵات و پویل بوی دەس لەناو کار گۆڵچی هەڵوژاردە دیرێد.

 ئەبو حەمرە دویای وازهاوردنی لە ساڵ  1995 بویە پیشەگەر لە یانەی وحدات ئوردن لە ساڵ 1994 تا 2000، و چوار پاڵەوانیەتی خول و جام وەدەس هاوردن، و لە ساڵ 2000 وەگەرد تیم راهێنان بەڕازیلی ئەرا یانەی وەکرەی قەتەری کار کرد، و وەگەردیان بویە خاوەن نازناو خول قەتەری، ئیجا گلەو خوارد ئەرا ڕاهێنان وەرد وحدات ئوردنی، و دویای ئەوە دەسکردە کار ئەرا یانەی شارقە ئەرا چینەیل تەمەنی لە ئیمارات، و دووارە وە دەسمیەتی هاوڕیی کازم شبیب گۆڵچی ئەرا قەتەر گلەو خوارد، و دویاترین شوین، راهێنان تیم مینا لە بەسرە لە ساڵ  2014.