ماجد شالیار: هیمان وەچەک هونەر جەنگ ئەرا کوردایەتی شار خانەقین کەیمن
شەفەق نیوز/ هەر ماوەی جاریگ، بڕیگ لە خوەشک و برایەیل هونەرمەن و هونەردووس گردەو کەێد، و وەگەرد یەکەو لە ناو دووڵیگ، یا لەبان کویەیگ، یا لە کەنار ئاویگ، چ وە مینەی قارچگ، یا وە ئەزەرت سەوزەڵانی، یا لە ژیر واران، یا وە کووڵ پایسکل، یا لە شوینیگ ئاسەواری، ماجد شالیار دیار دەێد، کە دووسی سروشت شار خانەقین و گشت سویکەیلی نشان دەێد.
ماجد شالیار، هونەرمەن شیوەکار، مامووستا لە پەیمانگەی ھونەرە جوانەیل، وەڕیەوبەر ناوەند کلتوری خانەقین، و سەرپەرشتی مۆزەخانەی خانەقین کەێد، لە دەمەتەقیگ وەرد ئاژانس شەفەق نیوز.
-ماجد شالیار چوین خوەد ناسنی؟
: من جویر هونەرمەن دویای تەواوکردن کولێژ هونەرە جوانەیل لە بەغدا، لە ساڵ 1990، روی وەرەو وینەکیشان کردم، و هەر خوەشم هات کار ئەرا خزمەتکردن شارەگە بکەم، کە هونەرمەن وە شیوەیل فرەیگ توەنێد پەیام دڵسووزی ئەرا جەهان کل بکەێد، و خوەشم تیەێد کوردبوین شار خانەقین نشان بیەم.
- هونه‌ر زوانێگه ك گشت له‌لی ره‌سنه‌و، هونه‌رمه‌نده‌یل خانه‌قین چه‌نی ئی زوانه وه‌كار هاوردنه ئه‌ڕا خزمه‌ت وه‌ی شاره و شیوە و ئاست هونەر لەلای نەوەیل نوو ئیسە لە خانەقین چه‌نی جیاوازه، چه‌نی باوه‌ڕ وه توانایه‌یلیان دیری؟
:هەڵبەت گشت کەسیگ لە ناحەز بەهرەی هونەری نەیرێد، وەلێ لەناو ئەو پۆلە کە من مامووستایانم، کە 17 خوەنەوارن لە پەیمانگەی ھونەرە جوانەیل، ئەوانەک بەهرەی هونەری دیرن کەمن، وەلێ یەیش کاریگ گشتییە، وەگەرد ئەوەیش خانەقین وە ئاست بەرزیگ هونەرمەن لەناوی پەیا بوود.
- چشته‌یلیگ په‌یكه‌ر سازی و شیوه‌كاری له ئه‌و هونه‌ریل ترەک جیا‌وه كه‌ێد، تاریخ ئی هونه‌ره له خانه‌قین ره‌سێده كوو؟ کەی هوكاره‌ی زوان شیوه‌كاری و په‌یكه‌ر سازی بوی و كه‌ی دەسکردیدە ئی کاره ؟
- ماجد شالیار جویر مامووستا لە پەیمانگای هونەرەجوانەكان لە خانەقین، وه‌ل گوزه‌شته‌ی خوه‌ی ژییه‌ید یا هیمان چاوی ها له بانان ؟
: وەگەرد راسی خوەمەو ژیەم، وەلێ وەگەرد ئەوەیش هەر چەوەڕی چشتەیلیگ گەورەتر لە بانان کەم، کە کار و تەقەلا ئەرای دەم.
- چەن پەیکەر کەسایەتیەیل شار خانەقین هاناو مۆزەخانەگە، و کی دروسیان کردگە ؟
: ئیرنگە 16 پەیکەر ئەرا کەسایەتیەیل شار خانەقین لەناو مۆزەخانەگە هەس، و ئی پەیکەرەیلە وە چەن گامیگ رەسینە ئەنجام، کە هەر هونەرمەنیگ بەشگ لە کارەگە ئەنجام دەێد، و خوەمیش دەسم لەناو گشت کارەیل بویە.
-لە وەختیگ تابلۆی شیتەیل خانەقین کیشاێ، و جویر ئاگر ناو کەی لە خانەقین بڵاو بوی، ئەڕا ئەو شیتەیلە لەناو یەک تابلۆ گردەو کردێ؟
: تابلۆی شیتەیل خانەقین، هەناێ تەواو بوی، خوەمیش نەزانستم چوین ئی کارە کردم، کە من هەر لە زویەو پەیوەندییگ جیاواز وەرد شیتەیل خانەقین دیرم، و تام لە دانیشتن و قسەکردن وەردیان گرم، کە گرتەیگ تایبەت لەناو خەیاڵ خوەم کردمە رەنگ جویر تیمیگ چماێ وەیەکەو لە یەک شوین گردەو بوینە، و مەردم خانەقین دووسیان دیرێد، و پیەڵ خانەقین لە پشتیان نشان دام جویر هیماییگ ئەرا شارەگە کە ئی کەسەیلە گردەو کردگە.
- ئەڕا وینەی خوەد لەناوی هەس؟ ئایا شیتی جویر بەشیگ لە هونەر زانێ؟
: وێنەی خوەمیش لەناو ئەو شیتەیلە دانام، تا ئەو کەسەیلە دڵگران نەکەم کە بویشن وە کەم زانمەیان، هەمیش هەناێ کەفتنە وەر بوخت و توومەت سووکایەتیکردن وەی کەسەیلە توەنستم وەوە نشان بیەم کە من قەت نیاز سووکایەتی وەی کەسەیل نازارە نەیاشتمە، و هەمیش لە دادگا بویە بەڵگەی دڵسووزی نەک سووکایەتی.
ـ ئیسه له ناو كاره‌یلد هه‌م له باوه‌ت و هه‌م له شیوه چه‌نی جیاوازی دوینید و چ چشتیگ ها له پشت ئی جیاوازییه؟
:کار خوەم کەم و هەرچەگ هاتە خیاڵم کەمەی وینەکیشان، و شیەوکردن و جیاوازی کارەگەم ئەرا رەخنەگرەیل هیشتمە، و هویر نیەکەم ئی کارە چە وەپی ئویشن.
-ئویشن کەسەیلیگ لەناو تابلۆی شیتەگان داد لە دەس ئی کارە کردنە، و کەسەیلیگ توڵەی خوەیان لەلید سننەسەو!
: دروسکردن تابلۆی شیتەیل، خستەمە وەر گیچەڵ و گلەیی فرەیگ، و تا ماوەیگ خوەم لە چەو مەردم شاردمەو، و رەسیە توومارکردن سکاڵا لەبانم، تا ئەو قسە و خوتە و گلیە کپەو بوین، ئیجا دیار خوەم دام، ئمجا کەمکەم مەردم دەسخوەشی ئەرا ئی کارە کردن، هەرچەن یەکیگ لەو کەسەیلە کە وینەی لەناو تابلۆگە بوی، رووژیگ لەناو بازاڕ وەشان دەڵەگیگ نادە پیمەو و وت: توڵەی خوەم سەنمەو.
ـ شالیار جویر وەڕیەوبەر ناوەند کلتوری خانەقین و مۆزەخانەگەی، چ پەیامیگ دیرێ؟
: پەیامم ئەوەسە کە خزمەت شارەگە بکەن، مەردم چەویان چەوەڕی هونەرمەن کەێد، کە هونەرمەن توەنێد ئاڵشاکارییگ دروس بکەێد، ئەراوە خوازم ئیمە جویر هونەرمەنەیل پەیامیگ رەنگیگ ئەرا مەردم بڕەسنیمن، و بایەسە وە گشت شیوەیگ هەمیشە نشان بیەیمن کە ئی شارە کوردە.
