نەسڕوڵلا ئازەرپیڕا: لە هەر کوو ژانیگ بوود منیش بوودە ژانم
شەفەق نیوز/ لە ناوەین خەونەیل رۆمانتیکی و ناسکی شاعرەیل، وکەشخەکردن ناودیارەیل وە داهێنان و دیبلۆماسی و قوڕاتی سیاسەتمەدارەیل و تەمایان، و غەم ئەو خەباتکارەیلە کە خەو وە بانانیگ خاستر ئەرا نەوەیل خوەیان دوینن، وە پڕۆژەیلیگ بڕاویی هاوسایەیل وەیەکەو گلەو بەێد، مام نەسڕوڵلا (سەبیل) کورد پەهلەوی فەیلی دەهلرانی، خوەی وە دەنگ قەویی ناسنێد کە لە ژیر سیوەڵەیلی درەچوود، تا بوونە نشانەیگ جیاوازر کە ناچارد کەێد لەژیر کەڵکەی خوسە و خەفەت زەردە خەنەیگ باێدە بان لیوود.
ئاژانس شەفەق نیوز میوانداریی کرد، تا پەیامیگ کل بکەێد، و چشتیگ بویشێد کە لەبان سۆشیال میدیا نەوتیەسەی.
- سڵاو مامە، چوینێ؟
: سڵاو و سوپاس ئەرا ئیوەیل خوەشک و برایەیل کورد فەیلی لە بەغداد و خوەرهەڵات دیجلە.
- مامە گیان، باس خوەد ئەرامان بکە
: نیەخوازێد خوەم بناسنم، لە هەر شوینیگ لە پارێزگای ئیلام بپرسێ هەگ وتێ کاک سەبیل، وەپید ئویشن: کاک نەسڕوڵلا؟ یە برادەرمە، یەیش وەخوەیەو نیعمەتیگە، کە خاسترین چشت خوەم وەپی بناسنم ئەوەسە مەردم ئویشن (برادەر گشتیە) و یە مەزنترین شەرفە را مه.
-تو جویر کەسایەتییگ گشتی ناسیایدە و لەبان سۆشیال میدیا گورجێ، کەمیگ باس ئە پەیامەیل دەنگی بکە کە ئەرا دەسەڵاتەیل کلیان کەێ.
: مە لەناو سۆشیال میدیا چالاکم، لە هەر کوو ژانیگ بوود منیش بوودە ژانم، ئەگەر ژان روییگ بیچارە بویە، کە ماڵی ویران کریاس، یا مناڵیگ ورسگ، یا ژان کەم ئاوی یا هەر چشتیگ ترەک.
هەر ماوەی، قسە ئەرا وەرپرسەیل کەم، و وە توومار دەنگی داد لە دەسیان کەم، و رەخنە گرم، تا بزانن کە واتەی راسگانی وەرپرسایەتی ئەوەسە کە لە نوای مەردم وەرپرس بوێ.
-لە چین هونەری چە؟
: پارچە دەنگ و ڤیدیۆیل فرەیگ کلکەم، فرەیان وە زوان کوردی خوەمانیە، واتە زاراوەی کوردی پەهلەوی کە زاراوەی شار دەهلرانە، و ئی پارچەیلە کۆمیدیای رەخنەگرە کە تیکەڵە وە نەهامەتی، و لەی پارچەیلە رەخنە لە رەفتار بەدیگ گرن یا کردەوەی گەنیگ، و من شانازی کەم کە وە زوان پاتشایل کورد پەهلی ساسانی قسە کەم، کە حکومڕانی ناوچەی میزۆپۆتامیا و مەدائین و بەغداد کردنە کە ناوەند ئیمبڕاتۆڕیەتیان بویە، و دویای وەعرەبکردن واژەگە بویە (فەیلی) و یەیش بەڵگەس کە کورد پەهلەوی لە ئیلام و کورد فەیلی لە عراق هەر یەکیگە.
- کەمیگ باس دەهلران بکە.
:دەهلران میلکان ژینگەی هاوبەشە ناوەین کورد و لوڕستان و عەرەو، و مە شانازی کەم کە لە شوینیگ لەداڵگبویمە وەگەرد گشت زوان و زاراوە و کەلتووریگ گونجیاس.
راسی مە لە ئێڵ جایرەوەند بالەوییم، کە شایەت شیوەیگ جیا بوود لە قسەکردن خود پەهلەوی یا پەهیلی یا فەیلی، کە یەکیگە لە ئێڵەیل کورد، کە لە کوینترین کەسەیلە کە هاتنسە دەشت دەهلران، و ناوچەگە وەگشتی ناسیاس وەناو ناوەین دوو چەم، لەوەر جیماگە و تەپەیل میژوویی و ئەو ئاسەواریەیلە کە ئەرا سەردەمەیل وەرجە میژوو گلەو خوەن، و بایەسە یە بویشم کە درویژەی ئێڵ ئیمە رەسێدە واست و عمارە و خوەرهەڵات دیجلە، و مە شانازی وە مەردم خوەم کەم، وەتایبەت گەل کورد کە تا ماوەی نیم سەدە لەژیر کوشتن و بڕین سەدام بوی، زنیوەچاڵ کریا، کوشیا و باری کریا و تەعریب کریا، و گەرد ئەوەیش، ناو و رووشنایی کورد فەیلی هیمان زنەس، چوینکە لە بنچینەو خەڵک خوەرهەڵات دیجلە بوینە، و قەت کووچبەر عراق نەوینە.
سەرسام بویم هەناێ دیم کە لەبان ئەو هەمکەی ستەمە لە دارودەسەیل سەدام وەبان کوردەیل فەیلی، هەر وە شیوەیگ کوردیانە و ئازا رەفتار کردن، تا رادەیگ کە هویر وە تووڵەسەنین لە لایەنگرەیل سەدام نەکردن، و ئەوە گشتی وەخاتر چەسپانن خوەمان لەناو عراق و نیشاندان وینەی نوویگ لە عراقیگ نوو.
نەک جویر گشت ناوچەیل عراق کە جەنگ هووزانە و مەزهەوی وەخوەی دی لە ماوەی دوو دەیەی گوزەشتە، خوەشبەختانە گیان هاوکاری ناوەین کوردەیل فەیلی و عەرەو نەیشت جەنگ هووزانە لە باشوور خوەرهەڵات عراق بوود.
- ئایا پەیوەندی وەرد کوردەیل فەیلی ناو عراق کردێ؟
: هەرچەن پەیوەندییەیل بنەماڵەیی جیاجیا هەس، وەلێ خاسترە کە بویشم نە، پەیوەندی وەردیان نەکردمە.
- ئەڕا؟
: چوینکە چەوەڕی کریایوێد پەیوەندییەیل ئابووری فراوان ناوەین ئامووزایەیل لە هەردوگ دیم سنوو، خوەشگوزەرانییگ زیاتر بارێد، ئەوەیش کە وەداخەو نەهاتەدی.
-گوایە ئویشێ ئەڕا؟
: شایەت مەردم کەموکوڵییان لەیە کەمترە، چوینکە دیارە کە وە مدوو نەوین ژیرخانی، ری وە دروسکردن ئیجویر پەیوەندییگ نییە.
کاشکا دەسەڵاتەیل پارێزگای واست ژیرخان ئەرا بازاڕەیل ئازاد لەهەردوگ دیم مەرزەگە دروس بکەن، و ئەگەر ئەو توانایش نەوی، بایەسە بەرهەمهاوردن بیگانە ئەرا ئی کارە بارن.
ئی داوا لە وەرپرسەیل و چالاکەیل ئابووری و کۆمەڵایەتی دیرم لە پارێزگایەیل واست و بەسرە و دیالە و عمارە و ناسریە چەویان وە خەڵک ئەو ناوچە بوود، لە تیژی نەداری سووکەو بکەن.
- دی چە؟
: ئومید خوازم فیستیواڵەیل هونەری و بازیەیل وەرزشی لە واست بسازن تا ئیلامیەیل ئامادە بوون، ئەرا یادکردن شەهیدەیل کورد فەیلی، و جام و یادەوەری ئەرا شەهیدەیل مەدەنی ئیلامی لە جەنگ عراق و ئیران، تا لە هویرمان نەچوود کە ئەرک میژوومان کاڵین دار برادەرەیە لە هەردوگ دیم سنوور، نەگ چویچانن تویەم تونەڕەوی، تا گلیەیگ ترەک ستەمکار و بیگانەیل نانەو.
هەناێ جاروبار ئەشنەوم کە تیم تووپان لە مهران وەرەو کوت چوود، یا ئەوان تیەن، دڵم خوەشەو بوود، ئەڕا حکومەتەیل ئیران و عراق و خاوەن کارخانەیل و پویلدارەیل خەرج ئەرا بازیەیل وەرزشی هەمەڕەنگ ناوەین ئیلام و واست نیەکەن، و یەیش پەڵپ گەورەیگ نییە لەو کەسەیلە کە مەرزەگە پشت وەپییان بەسێد، وەگورەی قسەی شاعر شێرکۆ بێکەس.
کارەیل ئابووری هاوبەش و کارەیل رووشنهویری و کۆمەڵایەتی هاوبەش تاوانەیل گەل هەردوگ دیمەگە بەرزەو کەن، و ئاسایش وەردەوام ئەرا ناوچەگە مسۆگەر کەێد، و یەیش لە گشتمان خوازێد بزانیمن کە وەگەرد بیناکردن دامودەزگایەیل سەربازی لە دیمەیل سنوور، ئەگەر شمارەی کەمیگیش لە بازاڕەیل مەرز هاوبەش بکەیمن، و شمارەی کەمیگ لە کارخانە و پاڵاوگەیل بکەیمن ئەرا وەکارهاوردن قاتەیل داهاتەیل ژیرزەوی هاوبەش لە نەفت و گاز، کە شمارەی کەمیگ لە بازیگا، یا هەر شمارەی کەمیگ لە فیستواڵ و بازیەیل هاوبەش بوودە بنەمای ئاسایش، ویەوەو ئاسایش و ئاسایش ئابووری و ئاسایش دەروینی، تەنانەت ئاسایش سەربازییش خاسترەو بوون.
- سوپاس، لە کۆتایی ئەگەر چشتیگ ترەک خوازێ بویشێ.
: تەنیا بیوەیی ئیوە خوازم، و مکیس ئیوەیل عراقی ئازیز کەم، ئەگەر هاتینە دەهلران، میوان ماڵم بوون، لەژیر چادر کوردەواری، تا کەرەی کوردەواری وەرەد ماس و کەباب پیشکەش وە ئیوە بکەم، و ئەرا ئەو شوینە بوەمەدان کە ئەرا ئەوزەڵکردن گەشتیاری ژینگەیی لە دەروازەی شارەگەم ئامادەی کردمە.
