دانیار محمد.. دەنگ شمشاڵ کوردی سووز تایبەت خوەی دیرێد
شەفەق نیوز/ وە شاگردی وەل باوگی لە کار وینەگردن ناو ئاهەنگ سویرەیل، یای بەشەوکردن مۆسیقا گرد، تا رەسیە ئەوە کە هونەرمەنەیل عراق، لە کورد و عەرەب، داوای دروسکردن کارەیل هونەرییان لەلای بکەن، کە کارەیلی بوینە تریند.
دانیار محمد، سەڕشتە لە کار بەشەوکردن مۆسیقا دیرێد، لە خانەقینەو دەسکردە کار، ئیجا چگە بەغدای پایتەخت، و ئیرنگە لە شار سلێمانی کار کەێد.
دانیار محمد حسين، لەداڵگبوی ساڵ 1991، بەکالۆریۆس لە زانکۆی پۆلی تەکنیک بەش تەندروستی کۆمەڵ دیرێد.
-ئایا چوین لە تەندروسی کۆمەڵ هاتیدە ناو جەهان مۆسیقا؟
:لەوەر ئەوە باوگم وینەگر بوی، هەمیشە لە ناو کارەیل هونەری و سویریەیل خانەقین و دەورگردی بوی و برادەر هونەرمەنەیل بوی و کار وەلیان ئەکرد، و فەرە جاریش کاری لەناو مۆنتاجکاری بوی و میوزک خستە بان فدێویەیل گشت، رووژیگ من ژنەفتمەیان، هەرلە گورانەیل کوردی و فارسی و تورکی و عربي، تا من دی خوەشم لە جەهان میوزک و هونەر هات، و هەرکەسیگ خوەشی لە چشتیگ باێد، هەڵبەت لەلیەو رەسێدە ئەنجامیگ.
ئیرنگە کارد چەس؟ وە چە ناوی نریەێد؟
-جویر هونەرمەن کورد، کە کار لە جەهان میوزیک ودەنگ کار کەم (بەرهەمهێنەر میوزیک )
-لە کەیەو ئی کارە کەێ؟
:لە ساڵ 2009 دەس کردمە کارەگەم تا ئەوەنە خوەم فێر کردم، و یەکەم کارم وە شیوەی فەرمی ساڵ 2014 بوی.
- له وه‌ختێگ ئاهه‌نگساز ئه‌را دروسكردن پارچه‌یگ موسیقا نیاز وه ئامیر موسیقی دیرێد، ساز خوه‌شه‌ویستد كامه‌سه؟
:ئەرا کارەگەم بایەس وە پیانو دەس بکەمە پی، خوەشترین ئامؽر وەلام شمشاڵ کوردیە.
-بەهرەی مۆزیکی لە خوەنەواری و فێربوین سەرچەوە گرێد یا لە چشتیگ ترەک؟
:بەهرەی میوزیک جویر بەهرەگانترە
وە پەیوەندی وە دەماغ دیرێد، کەس هەس لە قسەکردن ونۊسانن شعر بەهرە دیرد، کەس هەس لە وەرزش…
وەلی بەهرەی میوزک پەیوەندی وە گووش وژنەفتن دیرێد و چەن شوینگ هەس لە مەغز وەرپرسن لەی چشتە، و بایەسە تەقەلا بەیمن وە خوەنستن و تەکنەلۆژیا و وەردەوامبوین تا بەهرەگە گەورەترەو بوود.
- فرە لە زانایەیل و ناودیارەیل باس مۆسیقا وە فەلسەفەی گەردون کردنه، ئایا لەڕوی فیزیا و سووز دڵ، مۆسیقا پەیوەندییگ ناوەین ئایەم و گەردونیش دروس کەێد؟
:پێکهاتەیل گەردون جویر (ئەلکترۆن و فۆتۆن) جویر شەپۆل رەفتار کەن،
وەلی میوزکیش دەنگە و دەنگیش شەپۆلە،
وەختیگ گووش لە میوزک گرید گووش لە شەپۆلیگ دەنگ گرید، ئەو کەسە کە وە راسیەو چوودە ناو جیهان میوزک دڵی نەرمو ئارامەو بوود،
میوزک هیلێدەد زیاتر خوەش ژیان بتوای، قەدر ئەرای بنەی.
- ئاواز دانان پرۆسه‌ی دروسكردن موسیقایگ نووه، له‌ی باوه‌ته فیشتر له چه ئلهام گری ؟
:ئیلهام لە ژوورەگەی خوەم وەرگرم ژوور بی دەنگیگە و کپە هیلێدەم وەل دەیشتەو بووڕیەمەو، هویرم تەنیا لای میوزک بوود.
-چەنیگ سوود لە مەقام کوردی گرێ ئەرا بەرزکردن توانای مۆسیقایی؟
:سوود لە مەقام کوردی وەرگردمە و هەوڵ دامە تێکەڵی وەل میوزک جیهانی بکەم، چوینکە مەقام کوردی تایبەتی خوەی دیرێد.
- گشت شیوه‌یل موسیقی به‌ش كۆنتراست دیرن، چوین نووڕیده دابەشکردن مۆسیقا ئەرا دروسكردن کلیپ؟
گرنگی دابەشکردن میوزک ئەرا کلیپ فەرەس، جویر نۊسانن سیناریۆی کلیپ و مۆناتەجەگە وە گورەی ریتم گۆرانیەگە.
ـئایا بەرهەمیل کارد رەسینەسە چە ئاستیگ؟
:جویر دابەشکردن میوزک و مکس وماستەر گورانی دروس کردمە و بویەسە تریند لە پلاتفۆرم یوتیوب لە عراق و دەوڵەتە عەرەبیەگان، و تا ئیسە بەرهەمەیلم وەگشتی رەسینەسە نزیک 800 ملیۆن تەماشاکەر یوتیوب.
هەمیش 2 بەرهەم گورانی کوردی و عربي تێکەڵ کردمە کە وەرجەیە کەس نەكردێسەی و یەکیگیان بویە تریند 45 لە ئاست جیهانی
ئەوەکەی ترەک 68 لە سەر ئاست جیهان.
ئایا مۆسیقای کوردی خوارگ، چە جیاوازییگ یا سووزیگ دیرێد؟
جیاوازی مۆسیقای خوار وە گورەی شارەیلە، هەر شاریگ تایبەتمەنی خوەی دیرێد وەل زاراوە کاریگەری دیرێد، لە ئاوازو مەقام و شیوەی گورانی چڕین، ئەرا نموونە، ئامێر سازیش لە ناوچەی خوەمان جویر ناوچەگان ترە وەلی لە شیواز ژەنینی و دۆزان و سووزی جیاوازە.
