هەواڵی کوردستان ئێستا

شەفەق نیوز/ شار مهران لەبان سنوور ئیران و عراق، کە ئمڕوو یەکیگە لە ناودیارترین شارەیل و خاوەن فرەترین مەردم، وەرجە زیاتر لە پەنجا ساڵ یەی شاریگ بویچگ بوی، کە یەکەم ژیرخان شارستانی دروس کریا، لەلییان بازیگایگ وەرزشی بوی.

لە چەن دەورانیگ لە بارکردن کوردەیل فەیلی لە  هەفتا و هەشتایەیل سەدەی گوزەشتە، ئی شارە میوانداری کوردەیل فەیلی کرد، کە پەنابەر عراقی بوین، کە رژیم بەعس ماڵ و دارییان زەفت کرد، و پەنا وە کەسوکارەیل خوەیان بردن.

هەگ رەسینە پارێزگای ئیلام و شارەیل مهران و دهلران، سیمایەیل نوویگ لە ژیان شارستانی وەرد خوەیان هاوردن، لەناویان وەرزشی نوو جویر بازی تووپان، کیش بەرزەوکردن، و لەشجوانی و تەنس و پینگپۆنگ.

لەی دیدارە، وەگەرد جەواد سەیفی ڕاهێنانکار و وەڕیەوبەر تووپان قسە کردیمن، کە لە ماوەی چل پەنجا ساڵ گوزەشتە، بازیکەر سەرەکی و کاپتن تیم تووپان مهران بوی.  

*- با گلەو بخوەیمن ئەرا پشتینەی ئی پەیوەندییەیلە، ئایا توانێ باس میژووی بکەێ؟ 

 : ئەرا وەرجە پەنجا یا شەس ساڵ، یا وەرجە ئەوەیش بچیمنەو دویا، زانیمن کە خەڵک مهران سەردان عراق کەن، و چوینکە ئەو شارەیلە لە عراق کە سەردانیان کردن فرەتر گەشە کردوین، جویر بەغداد و کووت و خانەقین و بەسرە و عمارە، بیجگە مەزارگەیل ئاینی لە شارەیل کەربەلا و نەجەف و کازمێن و سامەڕا، هەڵسوبنیش کەلتووری و کۆمەڵایەتی و ئابووری ناوەین مەردمەگە بوی، و خەڵک مهرانیش وە توانایی خەڵک شارە گەورەیل عراق زانستیان، کە رەسین وەی شارەیلە ئاسانتر بوی لە چگن وەرەو شارە گەورەیل ئیران، و لەو هەڵسوبنیشە سوود گردن.

تووپانیش یەکیگ بوی لە سیمایەیل شارستانیەت مودێرن، کە توانیمن بویشیمن لەژیر کاریگەری کوردەیل فەیلی عراقی دروس بوی، و دویای ئەوەیش  وەشیوەیگ گەورەتر رەسیە عەبادان و خوزستان.  

*- چ چشتیگ زیاتر لەو سەردەمە؟

: هاتێ زیای نەوتمە ئەگەر بویشم بارکردن کوردەیل فەیلی لە عراق، و هاتنیان ئەرا پارێزگای ئیلام، هیشت کەسەیلیگ بان جویر پڕۆفیسۆر محمد هیوری، کە لە هووز کوردەلیە، کە لە عراقەو ئەرا ئیلام هات، و نەوەیگ لە گەنجەیل مهران پەروەردە کرد، منیش لەلییان، کە هیشتن ئاست تووپان لە مهران بەرزەو بوود، کە نەوەی دویەم لە شاگردەیلی رەسینە خاڵیگ کە لەی دەیەیل گوزەشتە بوینە نزیکەی نیم بازیگەرەیل سەرەکی لە هەڵوژاردەی نیشتمانی ئیران، لە گەنج و گەورە، و لەو شارەیل ئیلام و ناوەند پارێزگاگەیش وەیجویرە.           

*- چە بایەسە بکەیمن ئەرا ئی یادەیل تاڵ و شیرینە؟  

: دانیشتگەیل بان سنوور عراق و ئیران زانستن کە نەبایەس گلیە بخەنە بان یەکتری، لەوەر جەنگ و بارکردن و کشتوکاڵی وئەو کوشتن و بڕینە کە وەدەس سیاسەتمەدارەیل و دەسەڵاتدارەیلیگ جویر سەدام تیەن.

ئەوانە یادگاری خوەشیان وە هن خوەیان زانن، و یادگاریە گەنەیل وە مدوو خاوەن جەنگەیل، ئەراوە خوسەهاتن یەکتری باوەو نەکردن، و هەر ئەوەیش نیەکەن.

دویای جەنگ، تیم تووپان مهران بازییگ دووسی وەرد تیم سلێمانی لەو شارە کرد، و چەن بازییگ وەرد تیم تووپان عەزیزیەی عراقی لەو شارە و لە مهرانیش ئەنجام دایمن، و ئیمە خوەشاڵیمن وەوە کە ئیمە دووس ئاشتی توایمن لە شوین ئەو جەنگە، و یەکەو بازی کەیمن. 

*- پیشنیار ئیوە لەی باوەتە چەس؟

: لەی وەخت ئیسە، ساڵەگە زیاتر لە بازییگ دووسیانە وەڕیەو چوود، کە یا خوەمان میوانیمن یا میوانی برا عراقیەیل کەیمن لە بازی تووپان، و هەناێ ئەو میوانەیلە ئەرا مهران تیەن، و لەوەر کەمی شوینەیل و سپۆنسەرکردن، ئەندامەیل تیم مهران لەناو ماڵەیلیان میوانییان کەن.

لەلاییگ ترەک،  سپۆنسەرکەرەیل لە کۆمپانیایل عراق، وەرپرسیارێتی سپۆنسەرکردن بازیەیل تووپان هەمەلایەنە کەن، و ئەوان وەی کارە خزمەت گەورەیگ ئەرا گەنجەیل ئیرانی و عراقی پیشکەش کەن.

*- ئەگەر هەر یادەوەری خوەشیگ لە باوەتەیلیگ ترەک، باسیان بکە.

: با باس یاد خول تووپان لە ناسین کوردەیل فەیلی لە عراق بکەم.

یەکیگ لە برادەرەیلم شعریگ هن گۆڕان شاعر خوەنست، کە باوگ شعر کوردیە، و ئەو رووژنامەوانە خەڵک سلێمانی، و لە زوان و قسەی ئەو، کە وەرجە هەفتا و شەس ساڵ، هەناێ یەکەمین گلە تیم کوردەیل فەیلی وەرد تیم سلێمانی بازی کردن، کە مامووستا گۆران لە شیەوکردن هەڵوەسیگ کوردی وت: هەناێ تیمیگ لە بەغدادەو رەسیە سلێمانی ئەرا بازیەیل یانەیل، نووڕی کە لەناوەین خوەیان وە زوان عەرەبی قسە نیەکەن، بەڵکم وە زاراوەیگ کوردی نەناسیای قسە کەن، کە خوەشی هات بزانێد و لە زوانیان بپرسێد، کە وتن: ئیمەیش کوردیمن، کورد فەیلی بەغداد.

 سڵاو لە یاد      22 هەزار گەنج  كورد کەم، وەتایبەت بازیگەرەیل تووپان گەنجەیل کورد فەیلی، کە لە عراق وە دەس سەدام حسێن کوشیان، و ئومید خوازم بازیەیل هەمەلایەنە لە کووت و بەغداد وەڕیەو بچوود، ئەرا رێزگردن لەو دووسەیلە، وتیمەیل ئیلام و مهران وەتایبەت وە گشت شانازییەوە بەشداری بکەن.

ئیجویرە بازیەیلیگ قویلایی برادەری ناوەین دوو دەوڵەت هاوسا قویلەو کەن، و گەنجەیل وە دڵ و گیانیان فامن کە ئاشتی لە جەنگ خاسترە، و ئاسایش ئارام دروس کەێد.