هەواڵی کوردستان ئێستا

کەنعان موڕاد/ یەی کابرایگ وە کووڵ ئەسپیگ، هەر مانگیگ یا دوو مانگ جاریگ، ریی کەفتیادە ئاوایە دویرەگەی ئیمە، ئیمەیش کە مناڵ ئەو ئاوایە بویمن، چیایمنە پیری ئەو ئەسپ چەرمگە، کە هیمان ناو و روخسار سوارەگەی نیەزانیمن.

کابرای ئەسپ سوار، زانێد کە زاڕووەیل لە ریەگەی وسیەن، جویر ریواریگ بیگانە، و رەشمە و زین و لقاو و رکاو ئەسپ هەڵڕازیاگ جویر گوڵوەنی دویەتیگ لەناو سویر خوەی، ئەراوە، هەمیشە دەسی کردیاد گیرفانی، و نوقوڵ خستیادە بان سەرمان، تا ئیمە ئەو نوقڵ چویچیایە لە زەوی هەڵچنیایمن، هەناێ سەرمان هەڵگریمن، لە تەپوتووز شوین ئەسپەگەی زیاتر هویچیگ نییە.

ئەو سەپە، جویر خەیاڵیگ، لە هویرمانم تووژگ گرد، تا دویای ئەوەگ رژیم بەعس لەو ئاوایە بارمان کرد، و چگیمنە (شار سەورە) لە بەغدای پایتەخت، ئەسپیگ ترەک دیم.

ئەسپ هویل و لەڕ، عەرەوانەیگ لەشوین خوەی کیشێد، و کوڕیگ لەبانی نیشتیە، وە لویلەی ئاو (سۆندە) دەێد لەبان پشت ئەسپەگە، و پەسا گورانی چڕێد، یا هاور کەێد، یا چشتیگ خوازێد، نیەزانم!.. چوینکە عەرەبی ئویشێد، و منیش کوردم، یە مانگیگ نییە لە خانەقینەو بارمان کریاس، لەو هاوارە نیەفامم.

دویای تەماشاکردن ئەو ئەسپ لەڕ و گەڕە، و هویرکردن وە ئەسپ ئەو ریوار رەنگین و نقوڵدارە، کە سوارەگەی هویچ دەنگیگ نەکرد، هویچ قسەیگ نەکرد، وەرد خوەمەو وتم: چەنیگ لە بیدەنگی ریوار ئاوایەگەم فامستم؟ و چەنیگ لە قیڕەی ئی کوڕە نیەفامم!.