خالوو، بزنت وە چەن؟
کوڵە چیرووک
ئۊشن مەلا ناسردین، ڕۆژیگ کەڵگایگ برد کە لە بازار بزگیری، بفروشێ...
چوار کەس، تۊلەک و حەقەباز، دەست کردنە یەکێگ تا وە مفت و هەرزان، کەڵگا لە دەس مەلا دەر بارن...
لە یەکم هەوارگە، یەکلان چیەو دەر ڕێ ملا و وەت:
ئوخر خەیر مەلا، ئێ بزنە وە چەن فرووشی؟
مەلا وە بورەو لاێگ لە یارو هەڵکرد و وەت:
نەفام، یە کەڵگاس، بزن نیە!!!
یارو وەت: برا بۊش نیەفرووشم، دی ئڕا خراو و کەت و کەلەمە کەی؟
مەلا دجارە کەفتە ڕیا وەرەو بازار...
لە هەوارگەی دوەم، یەک تر لە یاروەیل، تەک خس لە مەلا و وەت:
کەرەم خودا لەی بزنە!
ڕاستی مەلا، ئەگەر فروشیدەی، من بسێنم...
مەلا وەت: براگەم یە کەڵگایگە...
دجارە کەفتە ڕیا و لە مەڵوەن سوەم، یەک تر لە هاودەسەگان لێ پرسی:
مەلا، ئێ بزنە، شیریش دێری؟
مەلا وەت:
نە، وە ڕێ هەوڵ و کووچ، بار بەی...
یارو قەیر فرەی خەنس و وەت:
مەلا، تا ئلان نەژنەفتمە، بزن بار بوەی...
لە هەوارگەی چوارم، یەک تر لە یاروەیل وەت:
مەلا، بزنەگەت وە دو سکە سێنم
مەلا وەت: یە کەڵگایگە و دە سکە قیمەتیە...
یارو قەیری خەنس و وەت:
شنەفتۊم کە مەلا فرە یاریکار و تۊلەکە، ئلان لە نزیکەو دیم.
ئاخری، مەلا، گەڵگا وە دو سکە فرووشا و وە خوەشڵەخوەشی، هاتەو ئڕا ماڵ.
ژنەی لی پرسی:
مەلا، کەڵگاگە وە چەنی فرووشای؟
مەلا وەت:
ژنەگە، وە خودا یە چەن ساڵە، گومان کردۊمن کە کەڵگای دیریم، نەزانستیم کە بزنیگە....
فەرهاد عزەتی‌زادە
