هەواڵی کوردستان ئێستا

کوڵە چیرووک 

ئۊشن لە دەوریگ، مەلا نەسردین دەسێ پەتی کەفت و کیسە و گیرفان خالی، دەست کردە گەیای کردن لە خەڵک...

لەو دەورە، پارەی رەوای بازار، یا سیم بۊ و یا زەڕ...

ئمجا، خەڵک، دایەم دەست کردنە گیرفانا و دو سکە نیشان مەلا دان. یەکێیگ سیم و یەکیگ زەڕ. مەلا هەم هەر رۆژ، سکەی نوقرە هەڵوژان و خەڵک وە یاری و تۊلەکی دەور مەلا گرتن و وەتن:

مەلا، خودا عەقڵ فرەیگ بەیدە تنو  و کیسەی ئیمەیش پڕ بکەی...

یە کار هەر رووژ بازار بۊ و مەلایش هیچ وەخت، سکەی تڵا هێز نیا و هەر ئێواریان، وە هەمیانێ پڕ لە سکەی نوقرە چیەو ئڕا ماڵ.

تا رووژیگ لە رووژان، رێوارگ تەتیا لەو شارە و ئێ حاڵ و حکایەتە دی و شنەفت.

دەم ئێوارە، دۊر لە چەو خەڵک خوەی رەسانە مەلایا و وەت:

هەی مەلا، یە بزان کە سکەی تڵا لە سکەی نوقرە رەواتر و گران ترە، دی لە سووا، سکەی تڵا قەبوڵ بکە...

مەلا زەردەخەنەی کرد و وەت:

ئەی پیر زانا، منیش ئێ گەپە زانم، بەڵام ئەگەر سکەی تڵا هێز بەیەم، دی لە سووا، بازار من و بازار خەڵک کەساد کەفێ. دی ئەوان چشتێ ئڕا خەنسن نەیرن و منیش دجارە، هەر ئیوارگان وە  دەس پەتی چمەو ئڕا ماڵ.

پیر زانا، تا ماوەیگ مقیەو برد و ئێکەش وە بێ دەنگ وە بێ کرچە،  لە مەلا دۊرەو کەفت و شار و مەلا و مەردم هیشت وە جی...

فەرهاد عزەتی زادە